На литии стихиры, глас 4.
Воспоим, вернии, еже о нас Божия благоволения величие, яко прославляяй различными
(л. 9)
чудесами вся прочыя царствия Своего пределы Господь призре и на смирение нас, рабов Своих, даровав граду нашему знамение Своего всеблагаго о нас промысла, чудесами зде прославленный Матере Своея образ; к немуже верою притекающе, приемлем вся благая и спасителная нам, да тако непрестанно Богоматерь воспеваем и рожденнаго из Нея Иисуса Человеколюбца и Спаса душ наших.
Глас 8.
Преславно чудо священныя книги повествует нам, яко пасый иногда овцы тестя своего Иофора великий Израилев вождь виде в пустыне великое видение, купину горящу и незгараему, из неяже Бог пред лицем его чудодействоваше; но сие еже древле бысть в Хориве, содеяся в пределех наших подобне; егда костромский вождь великий князь Василий, изшед на лов свой, в чащи дубравы внезапу обрете истиннейший образ прообразованныя купиною Богоматери и Превечнаго Младенца Ея, чудодействующаго во спасение наше; тем и мы возопиим к Нему Моисейскую песнь: Помощник и Покровитель бысть нам во спасение, сей наш Бог и прославим Его, Бог отец наших, и вознесем Его, славно бо прославися.
Глас 6.
Пустыня, яже бяше неславна и ненаселенна
(л. 9 об.)
иногда, за явление Божие, многочастне и многообразне в ней бывшее, сотворися напоследок духовныя премудрости училищем изшедшему из Египта Израилю; сице и мрачное оное место, в немже Богосветлое пречестнаго сего явление образа просия благодатию изображеннаго на нем Богомладенца Иисуса и предстателством Пречистыя Матере Его, устроися место душевнаго света, имже духовнии вожди новаго Израиля наставляются ко благоуспешному великаго сего служения прохождению. Сего ради мы, братие, толикую благодать преславным явлением чудесныя оныя иконы приемше, благодарим Просветителя душ наших и, благодаряще, воззовем к Нему: Свете Истинный, просвещаяй всякаго человека, в мир грядущаго, не престай присно исполняя светом Твоего Богоразумия всех во пустыни сей мудростию, яже свыше просвещаемых, да по внегда изыти им из нея, будут по словеси Твоему свет миру, тму нечестия и расколов потребляющии, и да ходят яко чада света во славу имене Твоего и во спасение Твоего достояния.
[На полях зачеркнутое примечание:] Сим прикладом намекается, что где древле явление было иконы, там напоследок устроися училищное собрание, семинариум называемое.
Глас 7.
Обхождением убо ветхозаветнаго ковчега падаху иногда стены проклятаго Иерихона за неверие живших в нем; принесением же
(л. 10)
во град наш чудеснаго Богоматери образа утверждаемся, вернии, во благих, яже ходатайствует нам Предстателница наша. Сего ради вси в радости духа возопиим к Ней: исполнихомся милости Твоея, Преблагая Мати наша. Но сотвори, да Твоими молитвами, якоже Моисей сына Навина, присно укрепляеши престол славящыя Тя ИМПЕРАТРИЦЫ нашея и подаеши достоянию Твоему победы на враги, ратоборствующия Церковь Сына Твоего и Спаса душ наших.
Глас 4.
Мал и презрен во градех Иудиных Вифлеем сотворися сугубо велик и славен произхождением из него Израилева царя Давида и плотским Рождеством Спасителя миру Иисуса Христа; подобне и град Кострома, менший пресловутых российских градов, знаменит во оных явися, ово яко дарова от себе всей России великаго царя Михаила Феодоровича, овоже яко прия в себе свыше чудоточную икону Спаса Христа Рождшия. Темже мы во един день обоих сих в радости духа воспоминание творяще, припадем и воззовем ко Христу: Господи, владеяй животом и царством человеческим, ради молитв родившия Тя Богоотроковицы сохрани, благослови и возвыси благочестно царствующую над нами ИМПЕРАТРИЦУ, юже от порфироноснаго Михаилова
(л. 10 об.)
племене избрал еси на престол Российския державы, да под ЕЯ благосенным покровителством пребывающе во всяком благочестии и чистоте, единодушно прославляем щедроты Твоя, ихже видимое знамение даровал еси граду Костроме в чудесном образе Рождшия Тя.
Слава и ныне: глас 8.
Откуду мне сие, да прииде Мати Господа моего ко мне, взываше Ти Предтечева мати, егда пришла еси в дом Захариин, Богомати Пресвятая; сице покровителствуемый Тобою град Кострома, приемля во пределы своя всечестный образ Твой и с ним богатство Небесных дарований, аки Самую Тебе и с Превечным Сыном Твоим приемлет; темже от неописанныя радости недоумевает, кое слово принесет Ти, или киими благохвалении в настоящий праздник явления иконы Твоея возвеличит Тя; точию, еже Дух Святый подаде иногда Елисавети, сие вси взываем о Тебе: откуду нам сие, яко целбоносным образом Своим прииде Мати Господа нашего, ради Ея подающаго нам мир и велию милость.
На стиховне стихиры самогласны, глас 4.
Принесенней бывшей иконе Твоей, Богоневесто Владычице, во избранный Тобою град наш, исполнися премногия радости великий князь
(л. 11)
и с ним вси верных собори, имуще с собою видимое знамение Твоего о себе благоволения; на неже и мы, сынове их, присно взирающе и оным о Твоем о нас промысле уверяющеся, в веселии духа приносим Ти днесь и Рождшемуся из Тебе песнь благодарения.
Стих: Слыши, Дщи, и виждь, и приклони ухо Твое.
Во облацех дугу положивый во знамение вечнаго земли с Небесами мира, дал еси знамение граду нашему Твоего всеблагаго о нем промысла, Владыко, утвердив во святилищи его всечестную Матере Твоея икону, на нюже взирающе, воспоминаем велия и преславная, яже древле сотворил еси со отцы нашими, и воспоминающе утверждаемся во уповании, яко Ты Иже с Ноем вечный завет поставивый, не оставиши древния оныя милости, являя к нам, верою Тя славящым и к ходатайству Матере Твоея с любовию прибегающим.
Стих: Лицу Твоему помолятся богатии людстии.
Волсви, пришедшии от восток, узревше звезду, еюже ко Христу, в Вифлееме рождшемуся, руководими бяху, возрадовахуся радостию велиею зело; сице и мы, вернии, взирающе на чудесную сию икону и видяще изображеннаго на ней плотию Бога с рождшею Его Преблагословенною Материю, радуемся
(л. 11 об.)
и веселимся, благодаряще Человеколюбца Иисуса, чрез икону сию руководящаго нас к познанию вочеловечения Его от Пренепорочныя Девы.
Слава и ныне: глас 8.
Во днех плоти Твоея, Иисусе Боже наш, пределы единаго дому Израилева прошел еси, благодетелствуя и всяк недуг и всяку язю в людех его исцеляя; но по днех востания Твоего, седя со Отцем на Престоле величествия, вся концы вселенныя славою чудес и множеством щедрот Твоих исполнил еси; ихже да не лишен будет и смиренный град наш со пределы своими; благоволил еси Спасе наш, славою благотворителных дел Твоих обогатити его. Се бо даровав ему пречестную Матере Твоея икону, всем притекающым к ней с любовию чудесно благодееши, яко Твоим мановением в недузех сущым и от дух нечистых одержимым исцелятися, и всем, к Тебе верою приходящым, ощущати Божественную Твою силу; сего ради и мы, толиких дарований наслаждающеся, в радости духа взываем Ти: слава Твоему всеблагому о нас промыслу, Едине Человеколюбче и Спасе душ наших.
На благословении хлебов тропарь Богородице, глас 4: Пришествием честныя Твоея иконы: трижды. Писан на малей вечерни.
(л. 12)
На утрени
На Бог Господь тропарь Богородице, трижды.
По 1‑м стихословии седален, глас 4.
Стекшеся на пения чудес, яже ходатайством Матере Своея яви нам Господь сил во славу Свою, подражаим, вернии, Богоприятней добродетели Ея, еюже движима слагаше иногда в сердце Своем вся оныя глаголы, яже от Бога чрез ангелов и человеков слышаше о величии и славе рожденнаго из Нея Иисуса Человеколюбца и Спаса душ наших.
Слава и ныне:
Якоже светоносное Тя и сладчайшее солнце, образом Твоим Божественным, Владычице, приходящую, град наш Кострома со страхом сретает, освящающую наша душы и телеса; тем молим Тя, Всепречистая: молитвами Твоими избави ны от всякия напасти и скорби.
По 2‑м стихословии седален, глас 3.
Блаженно чрево бысть Приснодевы, яко носившее Христа Господня; блаженнейше же бысть сердце Ея, яко приемшее и сохраншее словеса Его. Сего ради и мы, братие имети желающе с Нею часть, яже во веки не отимется от Нея, подражаим оному любомудрию Ея, да во свое время услышим от праведнаго Мздовоздаятеля сладкий оный глас: блажени есте и вы, слышавшии слово Мое и сохраншии е.
Слава и ныне:
Яко имущая неизреченное дерзновение ко из Тебе
(л. 12 об.)
рождшемуся Христу Богу нашему, Пречистая Госпоже Богородице, Божественное Твое сие торжество радостно совершающыя и священное иконы Твоея пришествие верою чистою славословящыя поминай милостивно Всемилостивая, помиловатися всем, поющым Божественная величия Твоя и исповедающым Тя, сущую Богородителницу.
Полиелей, припев: Достойно есть:
Псалом: Боже суд Твой цареви даждь:
По полиелеи седален, глас 6.
Да ходатайство еже о нас Богоотроковицы действенно будет ко Спасу нашему, вонмем и мы гласу Ея, имже иногда званным на брак в Кане Галилейстей повелевашеся творити вся, яже речет Он, сотворити; сице бо и нам усердно совершающым вся, от Христа повеленная, молитвы Матере Его исходатайствуют благая, исполняющая лишение и нищету душ и телес наших.
Слава и ныне:
Божественный приспе праздник чудеснаго пришествия во град Кострому пречестныя иконы Всенепорочныя и единыя Богоматере; радуйтеся убо вси, христоименитии людие, видяще сокровище сие некрадомое; веселися же и ты, Небесный жителю великомучениче Феодоре, сподобивыйся рукама сей образ Царя славы и Небесныя Царицы любезне носити; ему же мы с тобою припадающе прославляем величие Бога нашего и Того рождшия Приснодевы.
(л. 13)
Степенна 4‑го гласа, антифон 1.
Прокимен, глас 4: Помяну имя Твое во всяком роде и роде. Стих: Слыши, Дщи, и виждь, и приклони ухо Твое. Всякое дыхание: Евангелие от Луки, зачало 4. Псалом 50.
По 50‑м псалме стихира, глас 8:
Откуду мне сие, да прииде Мати: писан на литии славник.
Каноны Пресвятей Богородице два.
Первый, глас 4. Песнь 1. Ирмос:
Отверзу уста моя:
Отверзый ум разумети Писания учеником Твоим, Господи, да тако проповедят мирови славу Божества Твоего; отверзи ныне и наша сердца к слышанию и разумению величия Твоего и Матере Твоея, да с Нею боголепно прославим Тя.
Отверсти толкущым двери милосердия Твоего обетовавый, Владыко наш, отверзи нам утробы человеколюбия Твоего, имея на сие молящую Тя Ходатаицу еже к нам Твоего благоволения.
Отверсто иногда бысть молитвою Илииною небо, ради беззаконновавшаго Израиля заключенное; отверст да будет и нам, грешным, вход в Небесная предстателством Твоим, Богородителнице, да присно с Тобою отверзшаго роду человечу Небеса Сына Твоего славим.
Отверзшая рождеством Твоим врата вечная,
(л. 13 об.)
Богородителнице Пречистая, отверзи предстателством Твоим заключенныя сердец наших двери, да стояй при оных Сын Твой и Бог наш внидет и свечеряет с нами, якоже Сам рече.
Ин канон, втораго творца, глас 8. Песнь 1. Ирмос:
Колесницегонителя фараоня погрузи:
[Приписка на полях:] Сей канон оставить
Приидите, сошедшееся, правовернии, почтим песнми Пренепорочную и Пречистую Богородицу, из Неяже за милосердие неизреченное Слово Божие Плотоносец явися, спасе мир, егоже созда, и боголепно вси учреждающеся Тоя славою празднуем торжество Ея.
Якоже цветы различныя собравше от разумных цветников Духа словес, благодарственная пения радостно Боголепному величию Твоему приносим, Пречистая, прославляюще Тя, едину превышшую Небес, паче ума бывшую и просвещающую душы наша.
Слава: Едине вечный и безсмертный Царю, присно живый Сыне и Слове невидимаго Отца, Иже всяческая словом приведый, даждь ми слово во отверзение уст моих, да возмогу прославити Пренепорочную Матерь Твою.
И ныне: Отверзи нам двери милосердия Твоего, Всецарице Богородице, и помилуй ны, верно Божественныя иконы Твоея празднующыя явление и вопиющыя Ти:
(л. 14)
Радуйся, ангелов радование и спасение человеков; радуйся славо и похвало прославляющих Богопрославленное имя Твое.
Песнь 3. Ирмос:
Твоя песнословцы, Богородице:
Твоего плотскаго еже на земли смотрения да незабвенно устроиши воспоминание, дал еси нам, Владыко, икону Твою и Рождшия Тя; темже, взирающе на оную, молим Тя: руководи нас честным сим образом к познанию и люблению Тебе, воплощеннаго Бога и Спаса душ наших.
Твоея Пренепорочныя Матере всечестный образ любовию об’емлюще, из глубины души взываем к Тебе, живущему на Небесех: начертай на сердцах наших красный образ добродетелей Ея, да с Нею единомудренно величаем Тя, Господа и Спаса нашего.
Твой всечестный образ, Владычице любезно на земли приемлюще, зовем к Тебе, сущей во славе Небесной, да присно ходатайствуеши нам благодать мыслити и творити достойная Твоего величия, еже сотвори Тебе Силный.
Твоих благодеяний воспоминание, творимое днесь, движет сердца наша со устнами к благохвалению Твоему, Владычице; но сотвори, да и красный лик Твоих добродетелей привлечет сердца наша к люблению и подражанию оных.
Ин. Ирмос:
(л. 14 об.)
Утверждей в начале:
Божественными песнми почтим, вернии, Пресвятую и Пренепорочную Богоматерь, селение Божие Небес пространнейшее, благих сокровище преславное, Царев престол превысокий, ангелов многочестную радость и человеков покров и спасение, дверь Небесную, Еюже заключися дверь к смерти ведущая и живот дадеся естеству нашему.
Яко имущая неизреченное дерзновение ко из Тебе рождшемуся Христу Богу нашему, Пречистая Госпоже Богородице, Божественное сие торжество духовне совершающыя и священное иконы Твоея пришествие верою и любовию славословящыя поминай, Владычице Всемилостивая, помиловатися всем поющым величия Твоя и исповедающым Тя сущую Богородителницу.
Слава: Яко пречистый и превознесенный Тя престол, сущую Матерь Бога Вышняго прославляем, земнороднии, едину по рождестве Деву сохраншуюся, Еяже ради разрушися адово царство и мы от земли вознесохомся, и, покланяющеся честному образу Твоему, молим Тя: спаси достояние Твое, Владычице.
И ныне: Радуйся, Преславная и Пребожественная Дщи Бога Отца, радуйся, Превозлюбленная и Всесладчайшая Мати Сына Божия, радуйся, Превожделенная
(л. 15)
и Прекрасная Невесто Духа Святаго, радуйся, Покровителнице христоименитых людей Твоих.
Седален, глас 3.
Сии людие устнами чтут Мя, сердце же их далече отстоит от Мене, рече иногда Господь Вседержитель ко иудеем, един внешний вид благочестия являющым. Но да и мы не туюжде с ними часть и осуждение восприимем, братие, всячески блюдемся дел, подобных лицемерию иудейскому. Сего ради празднующе и всечестный сей праздник, да не явимся извне точию благоговейны, внутрь же уду зли и нечестивии пред Испытующим сердца и утробы; в простоте сердца поклонимся Ему, якоже Сам рече, духом и истинною, да тако будем подражатели Пресвятой Деве, в Нейже не глас точию, но паче душа величаше Господа и дух радовашеся о Бозе, Спасе Своем.
Слава и ныне:
Покрова Твоего Божественнаго, Пречистая Богородице Владычице, да не от’имеши от рабов Твоих, молят Тя угодники Сына Твоего: великомученик Феодор Стратилат и преподобнии чудотворцы, страны сея костромския и галицкия заступницы, ихже моление приими и помилуй нас.
Песнь 4. Ирмос:
Седяй во славе:
(л. 15 об.)
Седяй одесную Престола величествия на высоких, снизшел еси к долнейшим странам земли и, вселився во чрево смиреномудрыя Матере Девы, явил еси мирови, яко Ты призираеши на смирение рабов Твоих и даеши им благодать Твою, еяже да и мы сподобимся, даруй нам быти ревнители смиреномудрыя Твоея Матере.
Седяй на рамех Херувим и Серафим, благоволил еси плотию седети на об’ятиях Чистейшия Отроковицы, да сим покажеши нам, яко Ты, Святе святых, обитаеши в сердцах единых любителей чистоты и целомудрия, егоже рачители и нас покажи молитвами рождшия Тя.
Седящему во славе на Престоле Божества сподобилася еси Матерь быти, ради изящнейшия чистоты и смиреномудрия, ихже любители и нас покажи молитвами Твоими, да и мы сподобимся части, уготованной рачителем чистоты и смиреномудрия Твоего.
Седети во славе Сына Твоего сподобившаяся, Пренепорочная Дево, не престай молящи благость Его, да и мы, взирающе на образ святыя жизни Твоея и оному нашим жителством сообразующеся, тояжде славы на Небесех будем причастницы.
Ин. Ирмос: Ты моя крепость, Господи:
Гора еси великая и преславная Богородице, гора Господня явственная, превозшедшая и превозвысившаяся
(л. 16)
паче всех холмов и гор, человеческия глаголю и ангелския высоты, гора тучная и усыренная, Юже Бог освяти и жити в Ней благоволи, Ты царем утверждение и святителем похвала, христианом же покров и спасение.
Станем благоговейно в храме Богоматере, все верных множество, мысленне вземшеся под сень крилу Божественныя милости Ея, видяще силу и славу Ея, от светозарнаго зрака Ея сияющую; и общий лик составлше, умилно к Ней возопиим: не забуди, о Госпоже Царице, грешных рабов Твоих молитвы, приносимыя Тебе.
Слава: Радость неизреченную Твоею всесвятою иконою даровала еси достоянию Твоему, Всемилостивая Владычице, тем, предстояще всечестному сему Божественных даров сокровищу, умилно молим Тя: Богородителнице Марие Препрославленная, умилостиви Сына Твоего спасти душы наша, Тебе бо едину надежду имамы, раби Твои.
И ныне: Радуйся, Приснодево Марие Сладчайшая, радуйся, вместилище пространное и превысочайшее Небо Бога Слова, радуйся, раю живоносный, благоухания Божественнаго всяческая исполнившая, радуйся, превозвысившаяся паче горних умов и близ Бога сущи; радуйся, крепость достоянию твоему дарующая и благословляющая люди Своя миром.
(л. 16 об.)
Песнь 5. Ирмос:
Ужасошася всяческая:
Ужасахуся и смущахуся костромстии жителие, мневше знамение Твоего о них промысла, икону Матере Твоея, во пламени сгоревшу; но сие смущение пременил еси в радость, Господи, показав им абие образ сей, от огня и пепела невредим. Сице да и мы, во обуревающих нас искушениях и напастех, присно радуемся о Твоем, еже о нас благоволении, молим Тя, Человеколюбче.
Ужасошася иногда полки нашедших на град Кострому сопостатов, егда от воображения зрака лица Твоего, Господи, и Пресвятыя Твоея Матере пустил еси на них стрелы молниины; но сей ужас да вложиши в сердца и всех, стремящихся ратоборствовати достояние Твое, молим Тя с Ходатаицею нашего избавления.
Ужасеся великий князь костромский, узрев чудную икону Твою, Богородителнице, в пусте месте стоящу; темже, со многим благоговением приступив к ней, мысляше взяти ю; но, возбранен невидимою Твоею силою, научися не прикасатися ко святыне не священными руками; еже да и мы присно сохраняем, сотвори и нас благоговеяти ко всякой святыне.
Ужасни и скорбни бывше жителие Городца, узревше икону Твою, Богомати, пренесенну во град
(л. 17)
Кострому: мняху бо себе сим пренесением лишенных быти Твоего о них Матерняго благоволения; но да не и мы, таковою же иногда скорбию об’яти, будем лишени знамений Твоего покровителства, не престай, Владычице, пребывающи с нами Твоею милостию.