Ин. Ирмос: Вскую мя отринул еси:
Якоже сущая воистинну Богородица, молящися не престай, яко Мати, со дерзновением Сыну Твоему и Богу нашему, сохранити град Твой Кострому, к покрову Твоему притекающий и Божественней иконе Твоей покланяющийся, о Тебе державу имущий и к Тебе прибегающий, пристанищу и стене, единей Предстателнице рода человеческаго.
Да торжествует Адамский род, от негоже процвете девства неувядаемый цвет, Мария Пребожественная, от Неяже Царь славы Иисус, в плотскую багряницу оболкся, одежду раздра древняго нашего умерщвления, и да возопиет: Ты еси Богородице, обновления нашего сокровище и вечное спасение, Богорадованная.
Слава: Странна и преславна и естество побеждающая, яже в Тебе, Дево Пречистая, содеяшася. О чистоты Твоея безмерныя! Якоже бо лествица, чистота Твоя Божественная на высоту взыде Небесную, еюже Слово Божие странным сошествием к нам сниде и доле лежащее естество
(л. 17 об.)
наше на Небеса возведе.
И ныне: Яко очи рабыни в руку госпожи своея, тако очи наши всегда к Тебе возводим, о Многоблагоутробная Госпоже наша и Спасителнице Всесвятая Богородице! Призри убо на ны милостивно, царствующая на Небеси с Сыном Твоим и Богом, и ущедрити ны, грешныя, потщися, яко вся Тебе возможна суть.
Песнь 6. Ирмос:
Божественное сие и всечестное:
Божественное Твое разумеем истощание, Иисусе, Боже наш, егда, взирающе на образ Матере Твоея, зрим Тя с Нею яко Младенца, руками Ея держима; темже благодаряще сему Твоему еже к нам снисхождению, молим Тя, нас ради младенствовавшаго Бога, быти нам яко младенца незлобива и милостива о гресех наших.
Божественнаго Твоего воплощения еже от Девы, да присно славится таинство, даровал еси нам, Христе Царю, всечестную Матере Твоея икону с воображенным на ней видом Пречистаго лица Твоего; темже и молим Тя, Вседаровитый Господи, да даси нам присно во уме и сердце имети, устнами же славити воплощение Твое, имже человецы Божеству соединихомся.
Божественнаго Духа нашествие бысть на девственную
(л. 18)
утробу Твою, Богомати, егда Сына Превечнаго плотию зачала еси; Егоже да и мы в сердцах наших присно имамы, ходатайствуй нам благодать Тогожде Всесвятаго Духа, еюже бывают человецы таинственнии обители Отца и Сына.
Божественных писаний любомудрое рачение с присным во храме Господни пребыванием сотвори Тя избранный ипостасныя Божия премудрости Храм; но да и мы устроимся храмы Тогожде Бога Жива, исходатайствуй нам благодать усердно внимати и последовати Сына Твоего гласу, иже присно во храмех Его проповедуется.
Ин. Ирмос: Очисти мя, Спасе:
Тебе ради, Богомати Всепречистая, вся вселенная от лести диаволския свободися, и Крестом Сына Твоего весь род человеческий в райскую породу возвратися, Тобою Небо прославися и земля освятися; Ты убо, яко многоблагоутробная Мати щедрот и милосердия, ускори Божественнии руце Твои ко из Тебе неизреченно Возсиявшему милостивно воздети, да спасет душы наша, яко един Человеколюбец.
Молитвенницу благоутробную ко Господу стяжахом Тя, людие Твои, Пречистая, и любезно притекаем в церковь Твою святую и, покланяющеся пречистому образу Твоему, просим от Тебе великия милости. Избави убо нас от всяких напастей и болезней и от всякия злобы и мучения
(л. 18 об.)
и осуждения страшнаго, иже Тя, Владычице, присно блажащия.
Слава: Призри, молим Тя, Премилостивая Владычице, на люди Твоя, сущыя во обстоянии, и подаждь нам свыше помощь Твою, и благочестивейшую ИМПЕРАТРИЦУ нашу покровом Твоим остени, победы дающи ЕЙ на сопротивныя и брани всякия покаряющи под нозе ЕЯ, Тя бо по Бозе едину имамы Помощницу.
И ныне: Едина всех христиан Предстателница, едина грешных прибежище и упование, Пренепорочная Богородице, избави ны, рабы Твоя, от всяких бед и печалей, и страждущия злых прегрешений язвами, и тяжкими болезнми одержимыя исцеления сподоби, всечестному образу Твоему любезно покланяющыяся.
Кондак, глас 8.
Благодарственная приносяще Ти, раби Твои, Богородителнице, о всех, имиже благодеяла еси граду нашему, из глубины души взываем к Тебе и мили ся деем: не престани, Владычице, Матерними к Сыну Твоему и Богу нашему молитвами подавати вся благая и спасителная всем, верою и любовию вопиющым Ти: радуйся, Дево, христиан похвало.
[Помета на полях:] Икос 10 из акафиста.
Икос:
Предстояще зде священному и чудному образу Богоматере, возведем очи сердечнии на Небесная,
(л. 19)
идеже Сама Царица предстоит одесную Господа [одесную вычеркнуто дополнительно, Господу исправлено на Господа] славы, и, возведше умы и сердца наша к Ней, возопиим сице: радуйся, Благодатная, яко с Тобою соединивыйся плотию Господь сил, соединися Тобою и с нами; радуйся, благословенная в женах, яко перворожденнаго всея твари Сына Божия родила еси. Радуйся, достойне всеми роды блажимая, яко величием славы и изяществом добродетелей всех смертных превзошла еси; радуйся, крепкое сомнениями яже о вере колеблемых утверждение, яко сии слышат Тя Духом Божиим блажиму ради несумненнаго верования событию глаголанных Тебе от Господа. Радуйся, краснейшее чистоты рачителей удобрение, яко сии целомудрие свое зрят в Тебе, Чистейшей Деве, предувенчанно; радуйся, превознесенная смиреномудрия любителей славо, яко сии свое пред Всевышним унижение видят в Тебе даже до престола Его возвышенно; радуйся, во святом девстве и непорочном супружестве живущих украшение, яко Ты обоих сих превосходящее достоинство в Тебе единей сочетала еси. Радуйся, ко истинней мудрости и страху Божию изящнейшая предводителнице, яко Твое поучение и свет стезям Твоим выну бяше закон Вышняго; радуйся, усерднейшая Божественной воли исполнителнице, яко болшую паче всех человек обрела еси Твоими добродетелми
(л. 19 об.)
благодать у Бога; радуйся, всея Церкве Иисус Христовы избраннейшая красото, яко всех святых, иже суть на Небеси и на земли, величием и святостию без сравнения превзошла еси. Радуйся, радосте и славо всех, яко всем, к ходатайству Твоему притекающым, верный покров, крепкое защищение, скорую помощь и сладкое утешение присно подаеши, яко да вси согласно вопиют Ти: радуйся, Дево, христиан похвало.
Песнь 7. Ирмос:
Не послужиша твари:
Не служити твари паче Творца законоположивый человеком, Спасе наш, сотвори, усердно молим Тя с Богородицею, да, Духом Твоим просвещаеми, не к рукотворенным изображениям относим Боголепное служение, но чрез образ Твой возносимся умы и сердцы, к Единому Тебе, отцев Богу благословенному.
Не послужиша бывшии в пещи Вавилонстей мудрии юношы бездушному истукану, но Единому Тебе, во образе Ангела посреде пламене явлшемуся Сыну Божию, поклонишася, ихже лику и части сопричти и всех, изображением сладчайшаго зрака Твоего движимых к прославлению Тебе, отцев Бога благословеннаго.
Не послужила еси Богу нравом плотских иудеев, Пренепорочная Дево, но духом и истиною, яко истинная Раба Его, поклонялася еси Ему;
(л. 20)
темже да и мы с Тобою истиннии будем поклонницы Его, ходатайствуй нам благодать, еже не в суеверном Богопочитании, но во истинном благочестии и вере служити отцев Богу благословенному.
Не послужила еси миру и суете его, Богородителнице, но, всему предпочетши Единаго Бога и закон Его, была еси усерднейшая всех Раба Господня; темже и сподобилася еси послужити велией тайне Божия воплощения, яко Богоматерь; но сотвори, да и мы, отвергшеся мира и яже суть в мире, вседушно прилепимся и послужим Единому отцев Богу благословенному.
Ин. Ирмос: Божия снисхождения огнь устыдеся:
Всесвятая Владычице Богородице, сокровище милости Божественныя и едино по Бозе христиан упование, избави ны, на Тя надеющыяся, от всяких напастей и печалей, в нощи и во дни ныне же и присно молящияся Тебе и пречистому Твоему образу покланяющияся, и сподоби ны добродетелное тещи житие и ждати Сына Твоего с Небес, Иисуса Спаса и Бога нашего, избавляющаго нас Тебе ради от гнева грядущаго.
Верующии, Владычице, во имя Сына Твоего и Бога, вся отечествия язык, от края мира до конца его, Тебе, Пребожественную Его Матерь, непрестанно славословят, и покланяются и ублажают вси роди, якоже прорекла еси; с ними же и мы, недостойнии,
(л. 20 об.)
вопием Ти: Обрадованная, Господь с Тобою.
Слава: Превосходна есть, Пречистая Дево, слава Твоя неизреченная; обаче долг есть неотложный всему роду человеческому, еже славити и благодарити и величати Тя, Сущую спасение миру, Еюже бысть с нами Бог, и яко Тобою земнии обожихомся, взывающии Тебе присно: радуйся, Обрадованная, Господь с Тобою.
И ныне: Радуйся, Марие Всеблаженнейшая, радуйся, просвещение мира и чаяние языков; радуйся, скорбящих утешение, связанных разрешение и грехов избавление; радуйся, падших воскрешение, недугующих врачевание, ненадежным упование; радуйся, вдов и сирот и нищих прибежище, радуйся, Обрадованная, Господь с Тобою.
Песнь 8. Ирмос:
Отроки благочестивыя в пещи:
Отроча младо нашего ради спасения был еси, Безлетный Боже наш Иисусе, Егоже воображение зряще на священной Матере Твоея иконе, усердною в Тя верою вопием Ти: буди Воспитатель, Наставник и Покровитель младенцем и отроком нашим, да и сии во истинней вере навыкнут глаголати Тебе: Господа пойте дела и превозносите Его во вся веки.
Отрок дванадесятолетен бывый, Иисусе, посреде старец и учителей во святилищи пребывая,
(л. 21)
послушал еси их и, совопрошаяся с ними, являл еси святую ревность к Божественному закону, да сим и наша отроки наставиши тщатися во время юности стяжавати духовную, яже от закона Твоего премудрость, да и они научатся сердцы и усты, словесы же и делы превозносити Тя во вся веки.
Отроки от пещи Вавилонския избавлшему Господу молися прилежно, Богоневестная Отроковице, да дарует всем, под кров Твой прибегающым, неврежденным быти от огня искушений и пламене похотей, да, тако Тобою избавлшеся, чистыми душами и нескверными устнами благословим с Тобою Единаго Избавителя Господа и превозносим Его во вся веки.
Отроковицам Твое целомудрие и чистота да будет красота и слава, супругом Твое с праведным Иосифом непорочное сопребывание да будет венец и похвала, чревоносящым Твое безболезненное и святое рождество да будет сладкое утешение и отрада, всем же, всякаго пола и возраста чтущым Тя, Богоневесто, добродетели Твоя да будут любезнейшим и единым упражнением их, яко сими токмо достойне от человека прославляется Господь, живый во веки.
Ин. Ирмос: Седмерицею пещь:
Яко чертог прекрасный, Богородице Всецарице, явися
(л. 21 об.)
пребожественный храм Твой, святую Твою и чудотворную икону, яко жизни сокровище, честне соблюдаяй, тем благодарственными гласы прославляем Тя, всех добрых нам Ходатаицу.
Неизреченный в милости Единородный Сын Твой, Владычице, преславная приснодействует чудеса, известну всем являя силу Твою, веселится бо прошением Твоим и утешается о заступлении Твоем. Ибо Свою вменяет Твою славу, Егоже яко Бога и Тебе с Ним верно поюще, превозносим во вся веки.
Благословим Отца, и Сына, и Святаго Духа Господа.
Радуйся, Пречудная Небесная Невесто, Юже Сам Отец Небесный возлюби и прослави, и Дух Пресвятый осени, и Сын Божий без истления от Тебе родися; радуйся, благих сокровище и преукрашенная святыни палато; радуйся, Виновнице воскресения поющих и превозносящих Тя во веки.
И ныне: Божественным светозарнаго лица Твоего светом, ныне нам чудесне явлшагося, ущедри и благослови, просвети и помилуй, о светоносная Скиние Царя Христа; и день возсияй нам умнаго веселия, Ты бо еси жизнь и воскресение, и свет и спасительный покров всех правоверных, превозносящих Тя во вся веки.
Песнь 9. Ирмос:
Всяк земнородный:
Всякое колено Небесных, и земных, и преисподних
(л. 22)
да покланяется Тебе, яко носящему в Себе неизменный Преблаженнаго Отца Твоего образ, Иисусе. С нимиже и мы, верою просвещаеми, Тя, Истиннаго Бога, образ человеч от Девы приимшаго, боголепно величаем.
Всяка уста да заградятся блядословящих, яко несть достойно чествовати Твою и Пречистыя Матере Твоея икону, Владыко; се бо, прославив сию чудесами, научил еси достояние Твое Тебе и во образе плоти Твоея с Пренепорочною Твоею Материю прославляти и величати.
Вси роди верных, по проречению Твоему, блажат Тя, Благословенная, Христа Бога нашего Мати, с ними же и мы, верою совокуплени, благоговейно чтуще священное лица Твоего изображение, прославляем Твоя величия, яже сотвори Тебе Господь сил, с Ним же Тя величаем.
Всяк язык смертных, по достоянию, изнемогает величати Тя, над всеми превознесенную, о Богоневесто! Темже и мы, прославляюще Тя днесь, исповедуем наше крайнее неможение; но сие исповедующе, молим Тя, да по множеству щедрот Твоих приимеши малое сие приношение, во знамение многия любве и усердия нас, величающих Тя.
Ин. Ирмос: Ужасеся о сем небо:
Свет Присносущный, Иже от Присносущнаго Света превечное бытие имеяй, от Тебе, Пречистая,
(л. 22 об.)
воплотитися благоволи, и яко Жених от чертога, от Божественнаго произшед чрева Твоего, вселенную спасе яко Человеколюбец, Емуже молися, о Надежде всех концев земли, спасти стадо Твое, Тя величающее.
Радуйся, Всепетая Богородице, радуйся, апостолов и мучеников славо, радуйся, всех святых благолепие, радуйся, Небесных сил славословие, радуйся, христиан всех спасение, радуйся, озлобляемых помоще и радосте кающихся; радуйся, в темницах сущих, и связанных, и плачущих, и странных, и нищих Божественное утешение и Заступнице Тя величающих.
Слава: Премилостивый Царю славы, Христе, со Отцем и Духом присно от всея твари покланяемый, приими милостивно Пресвятую Матерь Твою, о мире Твоем умиленне молящуюся, Юже даровал еси утешение вечно и упование благо всем верным людем Твоим, Тя с Нею непрестанно величающым.
И ныне: Се на пучину неизреченных щедрот Твоих, Богородице Владычице, надеяся, непотребный раб Твой, принесох Ти недостойное словес извитие. О Предстателнице страшная, и Спасителнице премилостивая, и Помощнице готовая; приими сия милостивно, и простыню [прощение] ми преподаждь, и сотвори моление к Сыну Твоему и Богу, да обрящу милость Его в день грознаго испытания.
(л. 23)
Светилен:
Свет Лица Твоего и Пресвятыя Твоея Матере явивый нам, Владыко, во всечестней иконе сей, сотвори нас, яко чада света ходити во свете заповедей Твоих, да, егда явишися во славе с Рождшею Тя, сообразны будем светлейшему солнца образу Твоея славы.
Слава и ныне:
Божия тезоименитый дара страдалец Христов Феодор Божественный воистинну дар, пречестную Пречистыя Богоматере икону, граду нашему Костроме принес, вручает, юже мы с неизреченною радостию, яко Небесное сокровище, приемлюще, играим духовне и ликовствуем, просвещаеми светом Божественнаго лица Марии Приснодевы, от Неяже возсия Праведное Солнце Христос, просвещаяй всякаго человека, грядущаго в мир.